فوائد استضافة كأس الامم الافريقية 2019

بعد ما مصر كسبت حق تنظيم كاس الامم الافريقية 2019 . اصبح عندنا فرصة نعمل انعاش كبير للاقتصاد و السياحة من خلالها 

الاول سبب عدم حصول جنوب افريقيا علي حق التنظيم كان انها اشترطت تاخد جزء من ايرادات بيع حقوق البث من الاتحاد الافريقي لكرة القدم من ضمن شروطها . مصر مطلبتش الجزء ده .

شبكة التلفزيون الارضي ممكن تكون اكبر مستفيد من الحدث ده بانها تطور من المؤسسة لبث المباريات اللي شبكة بين اسبورتس واخدة حقوق بثها ف الشرق الاوسط . التطوير نفسه وايجاد طرق لتقوية البث الارضي في مصر هيخلي سعر الاعلانات عندها يرتفع بشكل كبير وخصوصا اذا قدروا يتعاقدوا مع نجوم كبار لتحليل المباريات و يتعاقدوا مع معلقين كبار .

الوضع الحالي لمصر بيقول ان المكاسب الاقتصادية المباشرة من البطولة مش كتير اوي لان دول افريقيا اغلبها دول فقيرة فمش هتلاقي مشجعين افارقة يجوا مصر بالكم اللي بنشوفه في اوروبا مثلا . انما علي المدي البعيد بتفيد السياحة بشكل كبير خصوصا لو استفادت من وجود الاثار عندك . زي انك تعمل حفل الافتتاح عند سفح الاهرام او تقوم بعمل تحالف بين الاثار والرياضة وتصنع متاحف متنقلة داخل الاستادات باسعار رمزية .. 

النقطة الاهم هي القدرة علي كسب البطولة وتسويق الرياضة المصرية و الفن المصري بشكل افضل من وضعها الحالي . 

السوق السوداء للعملة

النهاردة ان شاء الله حديثنا عن السوق السوداء للعملة بشكل هنحاول نكون فيه موضوعيين
السوق السوداء بكل بساطه معناها انك تدفع في الحاجة اكتر من تمنها عشان مش موجودة في السوق
الاسباب اللي بتخلي الحاجة دي مش موجودة في السوق كتير اكبر سبب هو الاحتكار
معني اني احتكر حاجة ان انا الوحيد اللي اقدر ابيع الحاجة دي في السوق
ودي ليها اسباب كتير ومش مجالها دلوقتي
نتكلم عن سوق العملة في مصر
الدولار دلوقتي في البنك ب 8.95 جنيه تقريبا لكن في السوق السوداء سعره عدي ال 11 جنيه وممكن ال 12 جنيه كمان
طيب ليه بقي فيه احتكار للعملة في مصر
خلينا نقسم الناس اللي موجودة في السوق ده كالتالي
البنك المركزي - البنوك - شركات الصرافه ( من ضمنهم السوق السوداء ) - رجال الاعمال - تحويلات المغتربين - المنح والقروض
دي المعادلة القديمة اللي لما تجمعها تجمعها كدا
البنك المركزي + البنوك + شركات الصرافة = رجال الاعمال + تحويلات المغتربين + السياحة + قناة السويس + المنح والقروض
خلينا نشيل قناة السويس من المعادلة عشان مش طرفنا وتعتبر تحت بند البنك المركزي
وشيل السياحة لانها انضربت ومعدتش بتدخل عملة صعبة للبلد عشان مفيش سياح
يبقي المعادلة بقت كدا
البنك المركزي + البنوك + شركات الصرافه =  رجال الاعمال + تحويلات المغتربين + المنح والقروض
البنك المركزي + البنوك عندهم الاحتياطي الاجنبي واللي هو بيبقي تحت تحكم البنك المركزي
شركات الصرافة عليها رقابة لكن مش بالشكل الكامل وهنرجعلهم تاني
دلوقتي معدش عندنا حاجات بتدخل دولارات الا تحويلات المغتربين + المنح والقروض
حتي رجال الاعمال معدوش بيحولوا الدولار اللي معاهم عشان سعره بيزيد ( دايرة فاضية بنلف فيها )
يبقي كدا وصلنا ان معدش عندنا غير التحويلات اللي بتيجي من برا بالاضافه لمنح والقروض زي اللي بتيجي من الخليج والسعودية وكدا
نرجع بقي لتحويلات المغتربين . ده بيبقي شقبان تعبان في الغربة . وده هو المصدر الوحيد للعملة الصعبة دلوقتي
لما حضرتك تيجي تقوله انا هاديلك الدولار ابو 8 جنيه ب 9 جنيه اكيد هيوافق عشان يكسب ..
رجال الاعمال والشركات بتحتاج الدولار عشان تشتري بيه منتجات من برا تروح للبنك اللي المغترب معدش بيشتري منه الجنيه مقابل الدولار . البنك بيقول معنديش والبنك المركزي خايف يطرح الدولارات اللي معاه في السوق ويقعد من غير الدولار اللي بيدفع بيه فوايد الديون اللي بياخدها بالدولار ( لفة ولا حد عارفلها اخر ) .
بتاع السوق السودا ده بيستفاد ايه من انه يشتري الدولار بسعر اعلي
لانه بيدي الدولار ده لرجال الاعمال عشان يشتروا بيه من برا ( او يهربوه - كل واحد ونيته ) وبيستغل احتياج الناس دي للدولار عشان يعلي السعر براحته وهما كدا كدا هيخدوه عشان محتاجينه
البنك الفمركزي طبعا داخل حرب ضد السوق السودا عشان السعر وبما انه معندوش كميه دولارات يقدر يغرق بيها السوق فبالتالي هو داخل الحرب خسران خسران وفي نفس الوقت ميقدرش يعوم الجنيه جامد عشان ينافس الدولار ( احنا مش في سباق دا خراب بيوت ودول ) .. فالحال بيستمر ارتفاع سعر الدولار في مصر عشان مفيش سياحه ومفيش تصدير ( خربانة خربانة )
الموضوع اكيد ليه حل ..............
حد فاهم حاجة ؟؟؟!!! 

مصر مش زي الصين ..

بعيدا عن كل التخبط بخصوص رفع البنك المركزي المصري لسعر الدولار مقابل الجنيه .....
الحديث هنا ليس عن هذا الرفع والنتائج المترتبه عليه ...
انما هنعمل مقارنه صغيرة بين الموقف ده في مصر و الصين
الصين طبعا بتحافظ علي سعر صرف اليوان الصيني بشكل شبه ثابت تقريبا واللي هو يعتبر اعلي من الجنيه المصري بشوية
لكن السبب اللي دفع الصين لاتخاذ القرار ده ان عندها قاعدة شركات منتجه كبيرة جدا بتعتمد علي التصدير .. فبالنسبه للمستهلكين في اوروبا المنتجات الصينيه اسعارها رخيصه جدا وبمواصفات بدات تبقي احسن نتيجه الاهتمام من الشركات دي . لكن يظل الاقتصاد الصيني اقتصاد قوي ومتماسك  ده كله طبعا بالاضافه لتوافر الموارد البشريه اللي اسعارها رخيصه ( وركز في النقطه دي - معندهمش تضخم وارتفاع اسعار ) بالاضافه لتوفر الموارد التانيه مع الابتكار والاختراع عندهم ..
علي الصعيد التاني مصر مفيهاش قاعدة شركات منتجه قايمه علي التصدير لان مفيش قاعدة شركات حقيقيه موجودة اصلا ...
الحاجة التانيه ان مصر اصلا الدين الخارجي ليها عالي جدا بالدولار ودا معناه زيادة ضغط علي مصر في النقطه دي
بالاضافه للتضخم في الاقتصاد والصدام مع السوق اسوداء في العمله .
الحاجة التانيه ان معدل التضخم لما يزيد بيزيد من الاسعار وبيزود تكلفه المواد الخام والموارد البشريه . وده بيدي افضليه نسبيه للشركات الاجنبيه ......
حد فهم حاجة ؟؟!!!!!!!

الضرائب ام الزكاه ؟!

في موازنات الدول بشكل عام يوجد بند مهم في الايرادات العام للدوله وهي الضرائب .. 

في عديد من الدول تمثل الضرائب نسبه تفوق 75 % من الايرادات في النظم الرأسماليه 

والضرائب تكون بنسبه مئويه متدرجه من الدخل .... بمعني اذا كان راتبك كفرد 1000 يكون هناك ضرائب بنسبه مثلا 10 % وبالتالي انت تاخد 900 و الدوله تاخد منك 100 . ( ولنا حديث اخر عن الضرائب ان شاء الله ) 

المفترض من الضرائب انها تكون في مقابل الخدمات العامه التي توفرها لك الدوله . الدعم . انارة الشوارع . رصف الطرق . الامن . بمعني اخر الخدمات التي لاتدفع لها اموال . بالاضافه طبعا لرواتب موظفي الهيئات الحكوميه ... 

اذا الضريبه تدفع للخدمات العامه ... اما الخدمات الخاصه بك فتدفع لها الاموال .. 

الزكاه هنا تمثل شئ قريب من الضرائب . فالزكاه تمثل نسبه تدفعها من رأس مالك كل سنه للدوله لتقوم علي رعايتك وخدمتك .. 

الاثنين لهم نفس النتيجه . الفارق ان الضريبه لها نسبه اكبر بكثير الزكاه بالاضافه ان الضريبه علي الدخل والذي يكون عاده اكبر من رأس المال . 

ع المفهوم الاخلاقي . الضريبه يوجد من يتهرب منها لانه لا يوجد نظم عقابيه حقيقيه . اما الوازع الديني فيختلف في الزكاه لانها تمثل العلاقه الدينيه للفرد بالاضافه الي ان الممتنع من الزكاه يستحق ان يقاتل من الدوله ( موقف ابوبكر الصديق من مانعي الزكاه ) 

........

بالنسبه لصرف هذه الاموال .

الضرائب معروف اين تصرف 

اما الزكاه فلها مصارف شرعيه 

( الفقراء والمساكين والعاملين عليها والمؤلفة قلوبهم وفي سبيل الله وابن السبيل وفي الرقاب والغارمين ) .

الزكاه ليست هدفها خدمه الناس فقط بل ايضا مساعده اصحاب الضيق .. مثل ما يسمي اليوم بالمعونه الاجتماعيه 

.............. 

الزكاه نظام عادل ياخذ من الغني للفقير بما لا يضر الطرفين 

اما الضرائب فتاخذ منهم الاثنين لتخدمهم بشكل يفيد الغني اكثر من الفقير .. والله اعلي واعلم 

..............................

شركات تشغيل الاموال

في التسعينات من القرن الماضي ظهرت ما تسمي بشركات تشغيل الاموال
هذة الشركات كانت اشبه بشركات الاستثمار بالبورصة لكن الفرق ان اسنثماراتها كانت في المقام الاول في رؤوس اموال الشركات
يعني تاخد من الفرد الفلوس وتستثمرها في شركه ناجحة . ارباح الشركات دي في اخر السنه بتتوزع علي اصحاب رؤوس الاموال او اصحاب الاسهم . قريب من فكرة البورصة . لكن البورصة بتعتمد علي بيع وشراء الاسهم . يعني الربح مش من الشركة اللي اسهمها في البورصة انما من تداول الاسهم نفسها .
توزيع الارباح ليه اكتر من اليه . لكن في الغالب كانت بتتبع النظام الاسلامي اللي بيقوم علي نسبة من الارباح من غير تحديد مبلغ معين . يعني لو شركة التشغيل كسبت من كل المشاريع اللي استثمرت فيها مليون مثلا . بتوزع علي الناس علي حسب اللي هما دفعوه في الاجمالي وبيكون فيه اتفاق بين الشركة وصاحب المال ان الشركة ليها جزء معين بنسبة مئوية من الارباح .
 المجال نفسه لو مفيش اليات رقابة للشركات دي تكون فيه سهولة كبيرة جدا لعمليات غسيل الاموال والكسب الغير المشروع .. وده كان احد اسباب اغلاق الشركات دي في تسعينيات القرن الماضي .
اعتقد دلوقتي الشركات دي ممكن تكون حل قوي جدا لتشغيل وتشجيع الاقتصادات والنمو بيها بالاضافة لعملية التمويل اللي فيها شركات كتير بتحتاجها لكن بيحدها عن الموضوع الفوايد العالية جدا اللي بتكون علي القروض من البنوك ......

الزكاة
الزكاة طبعا من اساسيات الاسلام الصحيح
لكن السؤال الاهم ليه الزكاة ؟! عشان نحس بالفقير ويبقي فيه ترابط مجتمعي بس ؟!!!
اكيد لا .
الزكاة ليها فايدة اقتصادية كبيرة جدا
الزكاة هو مبلغ بتدفعه عن راس مالك او ممتلكاتك او فلوسك لما يعدي عليها سنة هجرية كاملة
طيب . انا مثلا معايا 100 الف جنيه علي سبيل المثال . عندي حل من اتنين يا اما احطهم في خزنة مثلا ... وفي الحالة دي ال 100 الف دول مش هيتغيروا . او انك تستثمرهم حتي لو بايداع في البنك
حاليا لو انا وانت وكمان الف واحد شالوا 100 الف دول ايه اللي هيحصل
كمية الفلوس اللي موجودة في السوق هتقل
وده بيخلي الحكومة تطبع فلوس جديدة عشان الفلوس مش تبقي قليلة . فالبتالي الاسعار بتزيد نتيجة طبيعية لاني طبعت فلوس جديدة
بتيجي ازاي دي ؟!!
انا دلوقتي لسه معايا ال 100 الف وانت برضه والحكومات مش تقدر تجبرك ان تستثمر فلوسك او تعمل بيها حاجة . انت حر فيها
فدا بيخلي فيه فلوس زيادة في السوق فالاسعار تغلي عشان توازن كمية الفلوس . ورجعنا تاني للتضخم ....
طب الاسلام عملنا ايه بالزكاة ؟!
انت دلوقتي بتدفع نص العشر من الفلوس اللي عدا عليها سنة هجرية
فدا بيخليك لو انت مهتم تستثمر فلوسك لو حاسس ان فلوسك هتنقص بالزكاة .. الحاجة التانية ان ده بيخلي كمية الفلوس اللي في السوق تعلي حتي لو بمعدل بسيط . فده بيمنع التضخم او حتي بيقلل منه لانك بتدخل فلوس بالتدريج للسوق .......
الحاجة الاخيرة ان الزكاة تعتبر زي نظام المعونات الاقتصادية والاقتصاد يقدر يقوم علي موضوع الزكاة بديل عن الضرائب وانظمتها المعقدة وفي نفس الوقت التلاعب فيها هيكون بسيط لان محدش عنده استعداد انه يتلاعب في حاجة من اصول الدين ...
والله اعلم

الربا 

النهاردة كلامنا بشكل بسيط عن الربا 

الربا بيساوي حاليا فايدة البنوك . وهو معناه اي زيادة عن اساسي المبلغ الاصلي 

يعني بالعامية لو استلفت منك الف جنيه مثلا ورجعتهملك الف وواحد يبقي ربا 

عشان انا دفعت زيادة عن حقي 

............

طيب واحد ممكن يقول ما انا راضي اني اخد مثلا القرض ده بربا او بفايدة . ليه الدين مانعها اصلا 

هو ايه اللي دخل الدين في الكلام ده . الدين ده بتاع المسجد وبس 

اقولك بسيطة 

الدين نزل عشان ينظملنا حياتنا وعشان متتعرضش لظلم حد . الربا بقي بيزود الاسعار في السوق 

ليه ؟؟!!!! 

لان الفايدة او الربا زيادة عن الاساسي فبالتالي بيكون فيه فايض عن الفلوس الموجودة في السوق لو اتكلمنا عن المستوي العام 

بالتالي الاسعار بتزيد .. هاديلك مثل بسيط 

واحد صاحب محل خد قر مثلا ب 20 الف وهيدفعه مثلا 21 الف بعد سنة 

هو في نفسه هيقول مادام انا هادفع كتير يبقي لازم ازود ربحي من المحل فبيغلي السعر .. الحاجات دي بتيجي من الشركات الكبيرة اللي بتنتج مش من البقال البسيط ..... 

فالدين بيحللنا موضوع زيادة الاسعار اللي بتتسمي بالتضخم في الاقتصاد 

والدليل علي ان ده الصح ان الدول الكبيرة بعد الازمة العالمية في 2008 و 2012 قررت انها تخفض اسعار الفايدة ..... وفيه دول وصلت الفايدة لصفر .... 

وعشان تعرف ان الاسلام بيهتم بيك كفرد . حرم الربا عشان يحافظ علي شقاك وتعبك في تحصيل الفلوس االلي انت كسبتها 

بالاضافة الي انه بيحميك من زيادة الاسعار .... 

.........

الكلام ده شرح وفهم شخصي مني وقابل طبعا للمناقشة ......